أتعجب لمن يقارن اليوم وزراء حكومة الأحزاب الثلاث التي نالت 5 ملايين صوت من أصل 8 ملايين مصوت مع وزراء حكومات السنوات العشر العجاف. شحال من واحد كيطلب من وزراء الحكومة يتواصلو بنفس أسلوب البهرجة والشعبوية اللي قطعو معاها المغاربة نهار الانتخابات اللي سالات مع حزب الكلام. كون كان داك الأسلوب كيوصل لشي نتيجة كاع منوصلو اليوم لهاد المواصل، وكاع ميتكردع الحزب الاغلبي أكبر تكرديعة فالتاريخ. المغاربة اختارو الحكومة الحالية وهما عااارفين باللي أخنوش ماشي هو بنكيران وباللي الناس اللي غادي يكونو بجنبو غادي يكونو بروفيلات للعمل والخدمة والابتكار والفعالية ماشي آلات كلامية وأبواق تنتج جعجعة بلا طحين. اللي كينتاقد اليوم وزيرة السياحة ووزيرة الانتقال الطاقي ووزراء آخرين حيث مكيتقنوش حرفة الكلام غيكون كيظلمهم حيث المعيار باش تختارو ماشي هي الهضرة وإنما الفعالية في الإنجاز. التحدي الحقيقي هو إطلاق برامج كبرى بحال أوراش والفرصة ودعم القطاع السياحي ودعم الفلاحيين لمواجهة الجفاف ودعم المهنيين ديال النقل ودعم المقاولات والافراج على مراسيم التغطية الاجتماعية لفئات عريضة من المغاربة وتوقيع اتفاقيات مع النقابات ديال الصحة والتعليم في ظرف أقل من 6 أشهر من عمر الحكومة وفي ظل ظرفية اقتصادية عالمية صعيبة سبباتها الجائحة والحرب الروسية الاوكرانية. والحقيقة اللي خاص تقال للمغاربة وبصريح العبارة هو أنه لحسن الحظ جات هاد الحكومة بهاد التركيبة في هاد الوضعية وكون جاب الله جات هاد الوضعية في ظل الحكومة السابقة كنا غادي نعيشو وضع كارثي بكل معنى الكلمة.
السبت 28 يونيو 2025 | 02:36 ص
|
اترك تعليقاً
